Ghulam Husain Sajid
apne apne lahu ki udasi liye saari galiyon se bachche palaT a.enge
dhuup ki garm chadar simaTte hi phir ye sunahri parinde palaT a.enge
shaam aa.i hai aur sa.aton ke qadam paniyon ki ravani men rukne lage
kaun kahta hai in badalon se pare asman par sitare palaT a.enge
ye dariche isi tarah raushan rahen aur gulabon ki ḳhushbu salamat rahe
phir isi chhanv men saans lene ko ham apne apne gharon se palaT a.enge
ham musafir hain gard-e-safar hain magar ai shab-e-hijr ham koi bachche nahin
jo abhi an.suon men naha kar ga.e aur abhi muskurate palaT a.enge
phir unhi zard peḌon ke nange badan sho.ala-e-naḳhl se raakh hone lage
main to samjha tha mausam badalte hi phir Daliyon par vo patte palaT a.enge
ye safine jo ik lahr ke vaste apne apne bahav men bahne lage
ik adhuri masafat ki tasvir men phir koi rang bharne palaT a.enge
ek din yaad a.unga ‘sajid’ use umr ki be-karani men main bhi kahin
shaam aa.egi aur mere angan men bhi in daraḳhton ke saa.e palaT a.enge
Leave a Reply