jis ko qarib paaya usi se lipaT ga.e
suraj Dhala to log qabilon men baT ga.e
vo gul-parast jin pe baharon ko naaz tha
aa.i ḳhizan to pa-e-ḳhizan se lipaT ga.e
kis kis ki main hujum men ankhen nikalta
achchha hua ki aap dariche se haT ga.e
jo qahqahe ki jaan se ziyada aziiz the
zinda-dili ke naam pe kal vo bhi baT ga.e
ThiThure hue badan ko hararat na mil saki
chhat par chaḌhe to dhuup ke saa.e simaT ga.e
jin hauslon pe koh-e-giran ka guman tha
andhi chali to saikḌon hisson men baT ga.e
Leave a Reply