gham se ghabra ke qayamat ka talabgar na ban
itna mayus-e-karam ai dil-e-bimar na ban
ḳhvahish-e-did hai to tab-e-nazar paida kar
varna behtar hai yahi talib-e-didar na ban
mujhe manzur hai ye barq gira de mujh par
mujh se begana magar ai nigah-e-yar na ban
daman-e-hal ko bhi phulon se bhar de nadan
sirf mustaqbil-e-rangin ka taraf-dar na ban
bil-yaqin manzil-e-maqsud milegi mujh ko
na-umidi tu miri raah ki divar na bun
hai riha.i ki tamanna to gira de divar
qaid-e-zindan men rahin-e-gham-e-divar na ban
la.eq-e-hamd hai vo jis ki ziya hai un men
kam-nazar chand sitaron ka parastar na ban
main ḳhatavar huun to mujh ko miTa de sayyad
saare gulshan ke liye ba.is-e-azar na ban
aise iqdam ka hasil hai yahan nakami
bazm-e-saqi hai ye ‘kashfi’ yahan ḳhuddar na ban
Leave a Reply