aur to paas mire hijr men kya rakkha hai
ik tire dard ko pahlu men chhupa rakkha hai
dil se arbab-e-vafa ka hai bhulana mushkil
ham ne ye un ke taghaful ko suna rakkha hai
tum ne baal apne jo phulon men basa rakkhe hain
shauq ko aur bhi divana bana rakkha hai
sakht bedard hai tasir-e-mohabbat ki unhen
bistar-e-naz pe sote se jaga rakkha hai
aah vo yaad ki us yaad ko ho kar majbur
dil-e-mayus ne muddat se bhula rakkha hai
kya taammul hai mire qatl men ai bazu-e-yar
ek hi vaar men sar tan se juda rakkha hai
husn ko jaur se begana na samjho ki use
ye sabaq ishq ne pahle hi padha rakkha hai
teri nisbat se sitamgar tire mayuson ne
dagh-e-hirman ko bhi siine se laga rakkha hai
kahte hain ahl-e-jahan dard-e-mohabbat jis ko
naam usi ka dil-e-muztar ne dava rakkha hai
nigah-e-yar se paikan-e-qaza ka mushtaq
dil-e-majbur nishane pe khula rakkha hai
is ka anjam bhi kuchh soch liya hai ‘hasrat’
tu ne rabt un se jo is darja badha rakkha hai