Sayed Mujeebul Hasan
ThiThak gaya mah-e-nau jhiil men utarte hue
to ham ne dekha hai ab-e-ravan Thaharte hue
qasida-goi ḳhad-o-ḳhal ki nazare karen
vo aa.ine se kare guftugu sanvarte hue
na ird-gird ka kuchh hosh tha na ḳhud apna
ajiib haal tha ḳhushbu se baat karte hue
phir is ke baad simaTne ki aarzu na rahi
kuchh aisa lutf mila TuTte bikharte hue
main apna haal chhupane men kamyab raha
na dekh paaya vo ankhon men ashk bharte hue
zamin pe jis ki koi qadr thi na izzat thi
mila tha vadi-e-aflak se guzarte hue
zaban se kuchh na kaha muskura ke dekh liya
‘mujib’ se jo kiya ik saval Darte hue
Leave a Reply