Karrar Noori
main lamha lamha na.e apne ḳhadd-o-ḳhal men tha
ki jo bhi kuchh tha main apni shikast-e-hal men tha
nazar paḌa to vo aise na dekha ho jaise
vo aks aks tha aur apne hi jamal men tha
tire ḳhayal se main is qadar hua manus
tu samne tha magar main tire ḳhayal men tha
shikast-o-reḳht ne hi mujh ko ḳhud-kafil kiya
tha zaḳhm zaḳhm magar apne indimal men tha
tumhare va.ade se sadiyon ki umr le aaya
jo lamha qurbat-o-duri ke ittisal men tha
Leave a Reply