bachpan ki yadon ko bhula.e ek zamana biit gaya
ham ko des se bahar aa.e ek zamana biit gaya
galiyon aur bazaron men main maara maara phirta huun
ḳhushiyon ki ik bazm saja.e ek zamana biit gaya
meri taraf bhi chashm-e-karam ahbab kabhi farma.enge
un se ye ummid laga.e ek zamana biit gaya
kis ko ḳhabar kab puuri hogi ḳhvabon ki ta.abir mire
nindon ko palkon pe saja.e ek zamana biit gaya
is duniya men apne para.e ki hai ‘sahar’ pahchan kise
mahfil-e-jan men mujh ko aa.e ek zamana biit gaya
Leave a Reply