Zehra Nigaah
kaisa sakht tufan tha
kitni tez barish thi
aur main aise mausam men
jaane kyuun bhatakti thi
vo sadak ke us janib
raushni ke khambe se!
sar lagae istada
aane vaale gahak ke
intizar men gum thii!
khal-o-khad ki araish
bah rahi thi barish men
tiir nok-e-mizhgan ke
mil gae the mitti men
gesuon ki khush-rangi
ud rahi thi jhonkon men
main ne dil men ye socha
aab o baad ka rela!
us ko raakh kar dega
ye saja bana chehra!
kya daravna hoga
phir bhi us ko le jaana
aane vaale gahak ka
apna hausla hoga
barishon ne jab us ka
rang-o-rup dho daala
main ne darte darte phir
us ko ghaur se dekha
sidha-sada chehra tha
bhola-bhala naqsha tha
rang-e-kam-sini jis par
kaise dhul ke aaya tha
zard phuul sa patta
gesuon men uljha tha
shabnami sa ik qatra
aankh par larazta tha
raakh ki jagah us ja
ik diya sa julta tha
mujh ko yuun laga aise!
jaise meri beti ho
meri naaz ki paali
meri kokh-jai ho
daal se bandha jhula
taaq men saji gudiyan
ghar men chhod aai ho
tez tez chalne par
main ne us ko toka ho
haath thaam lene par!
mera us ka jhagda ho
kho gai ho mele men
bah gai ho rele men
aur phir andhere men
apne ghar ka darvaza
khud na dekh paai ho!
dafatan ye dil chaha
us ko god men bhar luun
le ke bhaag jaun main
haath jod luun us ke
chuum luun ye peshani!
aur use manaun main
phir se apne anchal ka
ghonsla banaun main
aur use chhupaun main
Leave a Reply