raat bahut sharab pi raat bahut paḌhi namaz
ek vuzu men ho ga.i mujh se ka.i ka.i namaz
tum to azaan de ke yaar jaane kahan chale ga.e
masjid-e-jism kya bata.e kaise paḌhi ga.i namaz
mere baghair ho na paa.i koi namaz-e-zindagi
hogi magar mire baghair meri vo aḳhiri namaz
main bhi bahut nashe men tha nashe men tha imaam bhi
us ne paḌha.i jaane kya main ne bhi kya paḌhi namaz
but-kada tha ki mai-kada saaqi tha but ki tha ḳhuda
sub.h raha na kuchh bhi yaad raat bahut paḌhi namaz
kaun suna.ega mujhe meri azaan ki azaan
kaun paḌha.ega mujhe meri namaz ki namaz
ye bhi koi maraz hai kya chal diye phir namaz ko
paḌh ke to aa.e the huzur aap abhi abhi namaz
jaise ki ek hi ghazal hoti hai saari umr men
vaise hi saari umr men hoti hai ek hi namaz
Leave a Reply