chhoḌ kar bar-e-sada vo be-sada ho ja.ega
vahm tha mera ki patthar a.ina ho ja.ega
main baḌa ma.asum tha mujh ko ḳhabar bilkul na thi
mere chhu lete hi vo mera ḳhuda ho ja.ega
da.era-dar-da.era hai sabz jangal surḳh aag
kab hava jaage ye manzar kab hava ho ja.ega
be-muravvat raston se be-ḳhabar shayad hai vo
phir kahin par mera us ka samna ho ja.ega
saat rangon ki jabin par vo likhega apna naam
jab vo apne rang ka aks ashna ho ja.ega
aftab us raaz se na-ashna shayad nahin
qaid-e-mehvar se kisi din ye riha ho ja.ega
haath men le kar qalam ‘manzur’ ye socha nahin
karobar-e-lafz men kya fa.eda ho ja.ega
Leave a Reply