Roohi Kanjahi
zalim pe azaab ho gaya huun
main roz-e-hisab ho gaya huun
har lafz mira hai ek ghaav
zaḳhmon ki kitab ho gaya huun
main ḳhud men simaT ke tha samundar
phaila to habab ho gaya huun
ḳhud apni talash kar raha tha
dekha to sarab ho gaya huun
yuun uTh gaya etibar-e-hasti
main ḳhud koi ḳhvab ho gaya huun
miTTi hui yuun ḳharab meri
sahra ka javab ho gaya huun
Leave a Reply