Sudarshan Fakir
patthar ke ḳhuda patthar ke sanam patthar ke hi insan paa.e hain
tum shahr-e-mohabbat kahte ho ham jaan bacha kar aa.e hain
but-ḳhana samajhte ho jis ko puchho na vahan kya halat hai
ham log vahin se lauTe hain bas shukr karo lauT aa.e hain
ham soch rahe hain muddat se ab umr guzaren bhi to kahan
sahra men ḳhushi ke phuul nahin shahron men ghamon ke saa.e hain
honTon pe tabassum halka sa ankhon men nami si hai ‘fakir’
ham ahl-e-mohabbat par aksar aise bhi zamane aa.e hain
Leave a Reply