kuchh aise chashm-e-tamanna ko azmaya gaya
kisi bhi aks ko puura nahin dikhaya gaya
darun-e-ḳhvab dikha kar koi hasin paikar
hamare honTon ka masraf hamen sujhaya gaya
adhura chhoḌ diya ishq is liye ham ne
hamen ye kaam mukammal nahin sikhaya gaya
phir is ke baad uThenge faqat sar-e-mahshar
gar aaj bazm se un ki hamen uThaya gaya gaya
mata.a-e-millat-e-ghaflat-shi.ar luuTi ga.i
phir is ke baad use niind se jagaya gaya
kabhi ḳhuda kabhi duniya kabhi mohabbat ka
hamare dil men sada ḳhauf hi biThaya gaya
ajab mo.amla rakkha zamane valon ne
jahan qayam tha lazim vahin giraya gaya
daraḳht aaj bhi ham ko dua.en dete hain
ki jin se naam tumhara nahin miTaya gaya
vo aaj aa.egi chhat par saheliyon ke saath
‘qamar’ sitaron ko laara ajab lagaya gaya
Leave a Reply