husn majbur-e-jafa hai shayad
ye bhi ik tarz-e-ada hai shayad
ek ghamnak si aati hai sada
koi dil TuuT raha hai shayad
ḳhud-faramosh hua jaata huun
tu mujhe bhuul gaya hai shayad
in hasin chand sitaron men kahin
tera naqsh-e-kaf-e-pa hai shayad
ek duniya se hue begane
tujh se milne ka sila hai shayad
har ghaḌi ashk-fishan hain ankhen
yahi anjam-e-vafa hai shayad
in labon par ye tabassum ki ziya
shoḳhi-e-baḳht-e-rasa hai shayad
Leave a Reply