Saleem Figar
ghamon ki aag pe sab ḳhal-o-ḳhad sanvare ga.e
ye kaise karb ke aalam se ham guzare ga.e
hua hai is liye bhi sogvar-o-nauha-kunan
hujum-e-shahr men ham log la ke maare ga.e
bisat-e-vaqt pe kheli ga.i hai jab baazi
hamin to khel men har samt rakh ke haare ga.e
vo chand TuuT gaya jis se raat raushan thi
chamak rahe the falak par jo sab sitare ga.e
jahan jahan se bhi guzre hujum-e-matam men
shagufta phuul se chehre qaza pe vaare ga.e
‘figar’ aag kahan ab dhuan bhi mushkil hai
vo shab ko os paḌi hai ki sab sharare ga.e
Leave a Reply