ik umr ki aur zarurat hai vahi sham-o-sahar karne ke liye
vo baat jo tum se kah na sake use bar-e-digar karne ke liye
kabhi zikr kiya tiri zulfon ka aur jaati shaam ko rok liya
kabhi yaad kiya tire chehre ko aghaz-e-sahar karne ke liye
fōt-path pe bhi sone na diya tire shahr ke izzat-daron ne
ham kitni duur se aae the ik raat basar karne ke liye
us aankh ne jis ki qismat men sach-much ke dar-o-divar na the
khvabon ke nagar abad kiye hasrat ki nazar karne ke liye
is behis duniya ke aage kisi lahr ki pesh nahin jaati
ab bahr ka bahr uchhal koi ise zer-o-zabar karne ke liye
Leave a Reply