ishq ko ka.enat ka maqsad-o-mudda.a samajh
phir tira zarf hai use dard samajh dava samajh
rah-e-vafa men mujh ko hukm ye hai ki apne aap ko
uTh to ghubar kar ḳhayal baiTh to naqsh-e-pa samajh
main jo harim-e-naz men sham-e-sifat ḳhamosh huun
is ko bhi ai nigah-e-lutf koshish-e-iltija samajh
ai dil-e-be-qarar-e-dost duur hai manzil-e-vafa
ja tujhe shauq de ḳhuda mujh ko shikasta-pa samajh
tera charagh-e-zindagi aḳhiri saans le jahan
ishq ke us maqam ko da.era-e-baqa samajh
duniya se ahl-e-ishq ko koi nahin hai vasta
sab se huun main alag-thalag sab se mujhe juda samajh
mere niyaz par hai tang dair-o-haram ki zindagi
ab ise abtari samajh ya ise irtiqa samajh
hasti-e-dost se alag tera vajud kuchh nahin
apni taraf bhi ab na dekh ḳhud ko bhi ma-siva samajh
arz-o-sama bara-e-dost kaun-o-makan sara-e-dost
jo bhi hai masiva-e-dost hirs samajh hava samajh
ishq men aur husn men koi nahin hai imtiyaz
ye bhi miri ada samajh vo bhi miri ada samajh
jin men na josh ho ‘zafar’ vo mire zamzame nahin
dil se jo khelti uThe us ko miri nava samajh
Leave a Reply