mire khudaya main zindagi ke azaab likkhun ki khvab likkhun
ye mera chehra ye meri ankhen
bujhe hue se charagh jaise
jo phir se chalne ke muntazir hon
vo chand-chehra sitara-ankhen
vo mehrban saya-dar zulfen
jinhon ne paiman kiye the mujh se
rafaqaton ke mohabbaton ke
kaha tha mujh se ki ai musafir rah-e-vafa ke
jahan bhi jaega ham bhi aenge saath tere
banenge raton men chandni ham to din men saae bikher denge
vo chand-chehra sitara-ankhen
vo mehrban saya-dar zulfen
vo apne paiman rafaqaton ke mohabbaton ke
shikast kar ke
na jaane ab kis ki rahguzar ka manara-e-raushni hue hain
magar musafir ko kya khabar hai
vo chand-chehra to bujh gaya hai
sitara-ankhen to so gai hain
vo zulfen be-saya ho gai hain
vo raushni aur vo saae miri ata the
so meri rahon men aaj bhi hain
ki main musafir rah-e-vafa ka
vo chand-chehra sitara-ankhen
vo mehrban saya-dar zulfen
hazaron chehron hazaron ankhon
hazaron zulfon ka ek sailab-e-tund le kar
mire taaqub men aa rahe hain
har ek chehra hai chand-chehra
hain saari ankhen sitara-ankhen
tamam hain
mehrban saya-dar zulfen
main kis ko chahun main kis ko chumun
main kis ke saae men baith jaun
bachun ki tufan men duub jaun
na mera chehra na meri ankhen
mire khudaya main zindagi ke azaab likkhun ki khvab likkhun