Siddique Afghani
le uḌe ḳhaak bhi sahra ke parastar miri
raah takte hi rahe shahr ke bazar miri
tez andhi ne kiye mujh pe bala ke hamle
phir bhi qaa.em rahi miTTi ki ye divar miri
chhup gaya tha mire jangal men koi saaya sa
aaj tak us ke ta.aqub men hai talvar miri
guunj ubhregi miri ruuh ke sannaTon se
salb ho ja.egi jab taqat-e-guftar miri
TuTti jaati hain sanson ki shikasta kaḌiyan
phailti jaati hai sahraon men jhankar miri
kitna be-kaif tamasha-e-baharan nikla
jab ḳhizan ban ke bujhi ḳhvahish-e-iz.har miri
ham-safar chand na suraj na sitare nikle
tez hai gardish-e-dauran se bhi raftar miri
atish-o-ab-o-hava ḳhak-o-ḳhala-o-aflak
kitne qilon pe ba-yak-vaqt hai yalghar miri
gham zamane men koi jins to ‘siddiq’ nahin
kya ḳharidenge koi chiiz ḳharidar miri
Leave a Reply