Farasat Rizwi
dukhon ke phuul to hain zaḳhm to hai daagh to hai
hara-bhara mire siine men koi baagh to hai
nahin hai vasl magar ḳhvab-e-vasl bhi hai bahut
zara si der gham-e-hijr se faragh to hai
bahut ujaḌe sahi umr ki sara.e magar
shikasta taaq men ik yaad ka charagh to hai
main tishnagi ka gila kya karun ki surat-e-dil
lahu ki mai se chhalakta hua ayagh to hai
tu kho gaya hai mire shahr-e-raftagan lekin
ye ek dard ki ḳhushbu tira suragh to hai
Leave a Reply