Samajh Mein Kuchh Nahin Aata

Noshi Gilani

hamen kis haath ki mahbub rekhaon men rahna tha

kis dil men utarna tha

chamakna tha kin ankhon men

kahan par phuul banna tha

to kab khushbu ki surat ku-e-janan se guzarna tha

samajh men kuchh nahin aata

hamen kis qarya-e-ab-o-hava ke sang rahna tha

kahan shamen guzarni thiin

kahan mahtab raton men kisi ko yaad karna tha

kisi ko bhuul jaana tha

kahan par subh ka aghaz karna tha kahan suraj nikalna tha

safar ke dasht men tanha thake-hare musafir ko

kahan khema lagana tha

kahan dariya men kashti dalna thi aur kis sahil utarna tha

samajh men kuchh nahin aata

hamen kis qarya-e-ab-o-hava ke sang rahna tha