us raste par jaate dekha koi nahin hai
ghar hai ik aur us men rahta koi nahin hai
kabhi kabhi to achchha-ḳhasa chalte chalte
yuun lagta hai aage rasta koi nahin hai
ek saheli baagh men baiThi roti jaa.e
kahti jaa.e sathi mera koi nahin hai
mehr-o-vafa qurbani qisson ki hain baten
sachchi baat to ye hai aisa koi nahin hai
dekh ke tum ko ik uljhan men paḌ jaati huun
main kahti thi itna achchha koi nahin hai
us ki vafadari mashkuk Thahar jaati hai
kar-e-vafa men dushman jis ka koi nahin hai
Leave a Reply