Zakir Khan Zakir
hijr ka ye karb saara be-asar ho ja.ega
koi naghma yaar ka jab charagar ho ja.ega
zindagi ik da.era hai gar muḳhalif bhi chalen
fasla un duriyon ka muḳhtasar ho ja.ega
valihana dastaken tum de ke dekho to sahi
dil mira ḳhali makan hai yaar ghar ho ja.ega
ab tumhare mo’tarif hain rahbar-o-rahzan sabhi
tum jise apna kahoge mo’atabar ho ja.ega
hai mayassar aaj janan kar lo apne gham ghalat
kal ko ‘zakir’ bhi purani ik ḳhabar ho ja.ega
Leave a Reply