kaise banaun haath par tasvir khvab ki
mujh ko mili na aaj tak taabir khvab ki
ankhon se niind ruuth ke jaane kidhar gai
katti nahin hai rat-bhar zanjir khvab ki
jis shahr men ho khvab churane ki vardat
kaise karun vahan pe main tashhir khvab ki
khvabon ne har qadam pe mujhe hausla diya
dekhi nahin hai tum ne kya tasir khvab ki
kab tak rahegi tirgi tere khayal men
raushan karegi us ko bhi tanvir khvab ki
us din to mere khvabon ko pahchan jaoge
jis din likhega koi bhi tafsir khvab ki
khvabon ko hi ‘iram’ ne asasa bana liya
rahne do mere paas ye jagir khvab ki
Leave a Reply