Poet
iid hai aur saqi-e-nau-ḳhez maiḳhane men hai
aaj piine ka maza pi kar bahak jaane men hai
kaif-o-masti jo tiri ankhon ke ḳhum-ḳhane men hai
vo tiri miina men hai saaqi na paimane men hai
hai gham-e-divar us ko aur na fikr-e-pairahan
kya faraghat tere divane ko virane men hai
gar jalane men jigar ka ḳhuun hai lutf-e-intizar
hijr ki lazzat bhi mar mar ke jiye jaane men hai
us ki nazren bhanp leti hain tujhe har rang men
kis bala ki hoshiyari tere divane men hai
aur uljhate chale jaate ho mere sub.h-o-sham
jab se tum ko ye shaghaf gesu ke suljhane men hai
ab bala se ho charagh-e-dair ya sham-e-haram
qasd jal kar ḳhaak ho jaane ka parvane men hai
Leave a Reply