ho sake to dil-e-sad-chak dikhaya jaa.e
ab bhari bazm men ahval sunaya jaa.e
haa.e us jan-e-tamanna se nibhegi kaise
ham se to raaz na ik roz chhupaya jaa.e
apna gham ho to use kah ke sukun mil jaa.e
us ka gham ho to kise ja ke sunaya jaa.e
raat bhar jin ki ziya se rahe raushan kamre
sub.h-dam un hi charaghon ko bujhaya jaa.e
dhyan men jis ke ka.i jagti raten guzrin
‘rahat’ ik raat use bhi to jagaya jaa.e
Leave a Reply