Aziz Nabeel
main apne gird lakiren bichha.e baiTha huun
sara.e-dard men Dera jama.e baiTha huun
‘nabil’ ret men sikke talash karte hue
main apni puuri javani ganva.e baiTha huun
ye shahr kya hai nikalta nahin koi ghar se
ka.i dinon se tamasha laga.e baiTha huun
jo log dard ke gahak hain samne aa.en
har ek ghaav se parda uTha.e baiTha huun
bahut talab thi mujhe raushni men aane ki
so yuun hua hai ki ankhen jala.e baiTha huun
ye dekho chand, vo suraj, vo us taraf taare
ik asman zamin par saja.e baiTha huun
na jaane kaun sa aalam hai ye aziz-‘nabil’
main regzar men kashti bana.e baiTha huun
Leave a Reply