vahshat si vahshat hoti hai
zinda huun hairat hoti hai
jal bujhne valon se puchho
gham ki kya hiddat hoti hai
rehn na rakh dena binai
is ki bhi muddat hoti hai
saare qarz chuka dene ki
kabhi kabhi ujlat hoti hai
dil aur jaan ke saude jo hain
in men kab hujjat hoti hai
khud se jhuut kahan tak bolen
thodi si khiffat hoti hai
apne aap se milne men bhi
ab kitni diqqat hoti hai
khud se baten karne ki bhi
ab kis ko fursat hoti hai
kuchh kah lo rukhi-sukhi men
apne haan barakat hoti hai
sona si mitti ke ghar men
kab ham se mehnat hoti hai
dhaan hamare chidiya khaen
chidiyon ko aadat hot hoti hai
bachchon se kya shikva karna
mitti men ulfat hoti hai
sabz kivadon ki jhurriyon men
jugnu ya hairat hoti hai
taat ke mat-maile pardon men
kya ujli rangat hoti hai
phati purani si chunari men
kya bholi surat hoti hai
chaval ki piili roti men
kya sondhi lazzat hoti hai
ruli ke ek ik tanke men
poron ki chahat hoti hai
jaade odh ke so jaane men
kab koi zahmat hoti hai
shaam ko tera hans kar milna
din bhar ki ujrat hoti hai
Leave a Reply