Poet
mahfil ishq men jo yaar uthe aur baithe
hai vo malka ki subuk-bar uthe aur baithe
raqs men jab ki vo tarrar uthe aur baithe
be-qarari se ye bimar uthe aur baithe
kasrat-e-khalq vo mahfil men hai teri ik shakhs
nahin mumkin hai ki yakbar uthe aur baithe
sar uthane ki bhi fursat nahin deta hai hamen
chu habab-e-sar-e-ju yaar uthe aur baithe
khauf-e-badnami se tujh paas na aae varna
ham kai baar sun ai yaar uthe aur baithe
dard kyuun baithe bithae tire sar men uttha
ki qalaq se tire sau baar uthe aur baithe
teri divar to kya gumbad-e-dvvar bhi yaar
chahiye ah-e-sharar-bar uthe aur baithe
aap ki majlis-e-ali men alarraghm raqib
ba-ijazat ye gunahgar uthe aur baithe
aap se ab to is ahqar ko sarokar nahin
jis jagah chahiye sarkar uthe aur baithe
hazrat-e-dil sipar-e-dagh-e-junun ko le kar
yuun bar-e-ishq jigar-khvar uthe aur baithe
chuun dilerana koi munh pe sipar ko le kar
sher-e-khun-khvar ko lalkar uthe aur baithe
kafashdoz un ke jab apne hi barabar baithen
aisi majlis men to paizar uthe aur baithe
zahid aaya to gavara nahin rindon ham ko
apni is bazm men makkar uthe aur baithe
donon kanon ko pakad kar yahi hai us ki saza
kah do sau baar ye ayyar uthe aur baithe
baithte uthte isi tarah ke likh aur ghazal
jis men ‘ehsan’ ho na paikar uthe aur baithe
Leave a Reply