Kunwar Bechain
ḳhud ko nazar ke samne la kar ghazal kaho
is dil men koi dard biTha kar ghazal kaho
ab tak to mai-kadon pe hi tum ne ghazal kahi
honTon se ab ye jaam haTa kar ghazal kaho
mahfil men aaj sham.a jalane ke din ga.e
tarikiyon men dil ko jala kar ghazal kaho
ghazalen bhi aadmi ki ibadat hain dosto
is ishq ki nadi men naha kar ghazal kaho
rah to liye ho itne dinon chandni ke saath
ab zindagi ki dhuup men aa kar ghazal kaho
koi tumhare dil men na utre to ai ‘kunvar’
tum hi kisi ke dil men sama kar ghazal kaho
Leave a Reply