bas koi aisi kami saare safar men rah gai
jaise koi chiiz chalte vaqt ghar men rah gai
kaun ye chalta hai mere saath be-jism-o-sada
chaap ye kis ki miri har rahguzar men rah gai
gunjte rahte hain tanhai men bhi divar-o-dar
kya sada us ne mujhe di thi ki ghar men rah gai
aur to mausam guzar kar ja chuka vaadi ke paar
bas zara si barf har sukhe shajar men rah gai
raat dariya men phir ik shoala sa chakrata raha
phir koi jalti hui kashti bhanvar men rah gai
raat bhar hota raha hai kin khazanon ka nuzul
motiyon ki si jhalak har barg-e-tar men rah gai
laut kar aae na kyuun jaate hue lamhe ‘adim’
kya kami meri sada-e-be-asar men rah gai
Leave a Reply