ye jo mujh par nikhar hai sa.in
aap hi ki bahar hai sa.in
aap chahen to jaan bhi le len
aap ko iḳhtiyar hai sa.in
tum milate ho bichhḌe logon ko
ek mera bhi yaar hai sa.in
kisi khunTi se bandh diije use
dil baḌa be-mahar hai sa.in
ishq men laghzishon pe kiije muaaf
sa.in ye pahli baar hai sa.in
kul mila kar hai jo bhi kuchh mera
aap se musta.ar hai sa.in
ek kashti bana hi diije mujhe
koi dariya ke paar hai sa.in
roz aansu kama ke laata huun
gham mira rozgar hai sa.in
vus.at-e-rizq ki dua diije
dard ka karobar hai sa.in
ḳhar-zaron se ho ke aaya huun
pairahan tar-tar hai sa.in
kabhi aa kar to dekhiye ki ye dil
kaisa ujḌa dayar hai sa.in
Leave a Reply