Wahshat Raza Ali Kalkatvi
kya hai ki aaj chalte ho katra ke raah se
dekho idhar nigah mila kar nigah se
sharm-e-jafa se chhupte ho tum dad-ḳhvah se
uzr-e-gunah tumhara hai bad-tar gunah se
un ki haya o sharm ne rakkhi hai dil ki sharm
kya hoga jab nigah milegi nigah se
insaf bhi yahi hai yahi shan-e-husn bhi
haan haan nazar churao qatil-e-nigah se
baitus-sanam se duur nahin hai haram ki raah
kyuun raah puchhen zahid-e-gum-karda-rah se
kyuun shikva ham karen adam-e-iltifat ka
vo puchhte to hain nigah-e-gah-gah se
zahid hazar haif ki pahuncha na koi faiz
rindon ke mai-kade ko tiri ḳhanqah se
parvanon ka hujum hai sham.a-e-jamal par
jiita phirega kaun tiri jalva-gah se
shikva karun tumhari jafa ka to ru-siyah
dekho na tum mujhe nigah-e-uzr-ḳhvah se
ḳhush.hali-e-raqib se vo shaad shaad hain
yaani hain be-ḳhabar mire hal-e-tabah se
gardan jhuki hui hai uThate nahin hain sar
Dar hai unhen nigah laḌegi nigah se
nikla na koi haif yahan qabil-e-shikar
sayyad ḳhali haath phira said-gah se
har chand ‘vahshat’ apni ghazal thi giri hui
mahfil suḳhan ki guunj uThi vaah vaah se
Leave a Reply