Salahuddin Nayyar
mata-e-hosh yahan sab ne bech Daali hai
tumhare shahr ki tahzib hi nirali hai
ham ahl-e-dard hain taqsim ho nahin sakte
hamari dastan gulshan men Daali Daali hai
na jaane bazm se kis ko uTha diya tum ne
tamam shahr-e-vafa aaj ḳhali ḳhali hai
ta.alluqat ko TuuTe hue zamana hua
vo ik nigah magar aaj bhi savali hai
ḳhulus banTta main sab ke ghar gaya lekin
tum aaj aa.e ho jab mera haath ḳhali hai
kisi ki sham.en sar-e-sham bujh ga.iin ‘nayyar’
kisi ke shahr men lekin abhi divali hai
Leave a Reply