aaj to be-sabab udaas hai ji
ishq hota to koi baat bhi thi
jalta phirta huun main dopahron men
jaane kya chiiz kho gai meri
vahin phirta huun main bhi khak-basar
is bhare shahr men hai ek gali
chhupta phirta hai ishq duniya se
phailti ja rahi hai rusvai
ham-nashin kya kahun ki vo kya hai
chhod ye baat niind udne lagi
aaj to vo bhi kuchh khamosh sa tha
main ne bhi us se koi baat na ki
ek dam us ke hont chuum liye
ye mujhe baithe baithe kya sujhi
ek dam us ka haath chhod diya
jaane kya baat darmiyan aai
tu jo itna udaas hai ‘nasir’
tujhe kya ho gaya bata to sahi
Leave a Reply