Abu Mohammad Wasil Bahraichi
aage vo ja bhi chuke lutf-e-nazara bhi gaya
chashm-e-ghaflat na khuli sub.h ka taara bhi gaya
sard-mehri se tiri garmi-e-ulfat na rahi
dil men uthta tha jo har-dam vo sharara bhi gaya
dil ke aine men jab aap ki surat dekhi
jis ko dhoka main samajhta tha vo dhoka bhi gaya
ishq ko tab-e-tajalli nahin kya dekhega
husn ye jaan ke pardon ko uthata bhi gaya
kis ne paai hai gham-e-yar-e-mohabbat se najat
ishq ka bojh kahin sar se utara bhi gaya
tere qadmon pe jo lazzat hai vo hasil na hui
yuun to sajde men sar-e-ijz jhukaya bhi gaya
dil ki ashufta-mizaji men na kuchh farq aaya
barha zulf-e-pareshan ko sanvara bhi gaya
mangne se kahin ye chiiz mila karti hai
dil churane hi ke qabil tha churaya bhi gaya
be-khudi tujh pe tasadduq hon mire hosh-o-havas
samne hote hue un ko pukara bhi gaya
ek hi chiiz hai parde men ki bairun-e-hijab
mujh ko zahir bhi kiya khud ko chhupaya bhi gaya
phir bhi ankhen rahin mahrum-e-tamasha-e-jamal
un ki tasvir ko shishe men utara bhi gaya
chhod kar mujh ko bhanvar men na khabar li meri
ik sahara tha tumhara vo sahara bhi gaya
pa-e-mahbub pe sar rakh ke hue ham ‘vasil’
zindagi paai nai maut ka dhadka bhi gaya
dil ke aine men nadida tajalli dekhi
khud-numai ka bhala ho ki vo parda bhi gaya
Leave a Reply