ḳhvab TuuTe sajana mushkil hai
pyaar pahla bhulana mushkil hai
sab ko us ki tamanna hai lekin
chand dharti pe laana mushkil hai
us ki ankhon men hain ka.i saghar
tair ke paar jaana mushkil hai
ham ne patthar lahu se sincha hai
phuul is par khilana mushkil hai
us ko ḳhud men talash karta huun
raaz sab se chhupana mushkil hai
dil ki hasrat nikal nahin paa.i
saari ḳhushiyon ko paana mushkil hai
us ke jaane se ḳhush nahin ‘qasid’
dil se ab muskurana mushkil hai
Leave a Reply