tire ḳhayal ka sho.ala thama thama sa tha
tamam shahr-e-tamanna bujha bujha sa tha
na jaane mausam-e-talvar kis tarah guzra
mire lahu ka shajar to jhuka jhuka sa tha
hamen bhi niind ne thapki di so ga.e tum bhi
tamam hadsa-e-shab suna suna sa tha
bala-e-sham ke saa.e the aur vadi-e-dil
agarche sub.h ka chehra dhula dhula sa tha
charag manzil-e-dil par jala ke kya karte
vafa ka qafila kab se ruka ruka sa tha
vo naam jis ke liye zindagi ganva.i ga.i
na jaane kya tha magar kuchh bhala bhala sa tha
Leave a Reply