bhare moti hain goya tujh dahan men
ki dur-rezi tu karta hai sukhan men
bahar-ara vahi hai har chaman men
usi ki bu hai nasrin-o-saman men
na phir idhar udhar nahaq bhatakta
ki hai vo jalva-gar tere hi man men
jahan vo hai nahin vaan kufr o islam
abas jhagda hai shaikh o barhaman men
hui jaati hai paani sharm se shama
magar vo maah aaya anjuman men
chhudaya tha nipat mushkil se phir aah
dil atka us ki zulf-e-pur-shikan men
junun ne dast-kari aisi bhi ki
na tha goya gareban pairahan men
mara jaata hai jis ghairat men dariya
gira kis ka hai dil chah-e-zaqan men
magar parvana jal kar ho gaya khaak
ki ro-ro shama jalti hai lagan men
jo sunte the dam-e-isa ka eajaz
so dekha ham ne vo tere sukhan men
na dekha us pari-jalva ko ‘bedar’
raha mashghul tu yaan ma-o-man men