vo ik lafz jo be-sada ja.ega
vahi muddaton tak suna ja.ega
koi hai jo mere ta.aqub men hai
mujhe mera chehra dikha ja.ega
vo ik shaḳhs jo dushman-e-jan sahi
magar phir bhi apna kaha ja.ega
jalegi koi mish.al-e-jan abhi
magar phir andhera sa chha ja.ega
nafi-e-jur.at-e-haq-numa.i sahi
magar kab kisi se kaha ja.ega
yahan ik shajar muntazir sa bhi hai
ab aḳhir kahan tak chala ja.ega
main vo mish.al-e-nim-shab huun ‘amir’
jise kal ka suraj bujha ja.ega
Leave a Reply