Saqib Lakhnavi
husn ki vo suraten ḳhvab-e-pareshan ho ga.iin
parda-e-dil men laga kar aag pinhan ho ga.iin
miT ke bhi a.ina-e-ruḳhsar-e-ḳhuban ho ga.iin
ḳhun-e-ahl-e-ishq ki bunden gulistan ho ga.iin
chhup ga.iin ankhon se zarron men numayan ho ga.iin
bastiyan ujḌi hui mil kar bayaban ho ga.iin
dekhta kaun aur bujhata kaun us dil ki lagi
haDDiyan jal jal ke sham-e-zer-e-daman ho ga.iin
zindagi men kya mujhe milti balaon se najat
jo dua.en kiin vo sab teri nigahban ho ga.iin
is hava-e-dahr men jam.iyat-e-ḳhatir kahan
dil ko jaane do ye zulfen kyuun pareshan ho ga.iin
zo.af baaqi hai koi jis ka nahin pursan-e-hal
quvvaten sab nazr-e-ishq-e-fitna-saman ho ga.iin
luuT li gardun ne aḳhir dil ki saari ka.enat
kuchh tamanna.en thiin vo bhi vaqf-e-nisyan ho ga.iin
dost-dar-e-gul huun main kis ne qafas se kah diya
mujh ko pa kar tiliyan ḳhar-e-mughilan ho ga.iin
kam na samjho dahr men sarmaya-e-arbab-e-gham
chaar bunden ansuon ki baḌh ke tufan ho ga.iin
arzu-e-alam-e-fani tha aadam ka vajud
ḳhvahishen thiin jo baham ghul-mil ke insan ho ga.iin
ḳhanuman-barbadiyon ka mujh pe ehsan hai ki main
un zaminon men nahin jo bas ke viran ho ga.iin
meri ankhen shor tha jin ki vafa ka har taraf
zaḳhm dil men paḌte hi donon namak-dan ho ga.iin
uqda-ha-e-gham se vabasta hai apni zindagi
ham kahan ye mushkilen jis vaqt asan ho ga.iin
main nisar-e-dast-e-qatil mar ke zinda ho gaya
ḳhanjar-o-shamshir ki dharen rag-e-jan ho ga.iin
ik sarab-e-dasht thiin faslen shabab-e-husn ki
dekhte hi dekhte ankhon se pinhan ho ga.iin
kya vafadaron ke ji Duube hain josh-e-ishq men
kashtiyan dil ki hazaron nazr-e-tufan tufan ga.iin
majma-e-ahbab ki rudad ‘saqib’ kya kahun
ab vo agli sohbaten ḳhvab-e-pareshan ho ga.iin
Leave a Reply