ada-jafarey

Kahte Hain Ki Ab Humse Khata-Kar Bahut Hain

kahte hain ki ab ham se khata-kar bahut hain

ik rasm-e-vafa thi so vafadar bahut hain

lahje ki khanak ho ki nigahon ki sadaqat

yusuf ke liye misr ke bazar bahut hain

kuchh zakhm ki rangat men gul-e-tar ke qarin the

kuchh naqsh ki hain naqsh-ba-divar bahut hain

rahon men koi abla-pa ab nahin milta

raste men magar qafila-salar bahut hain

ik khvab ka ehsan bhi uthae nahin uthta

kya kahiye ki asuda-e-azar bahut hain

kyuun ahl-e-vafa zahmat-e-bedad-nigahi

jiine ke liye aur bhi azar bahut hain

har jazb-e-betab ke ahkam hazaron

har lamha-e-be-khvab ke israr bahut hain

palkon talak aa pahunche na kirnon ki tamazat

ab tak to ‘ada’ aina-bardar bahut hain

More Poems

Leave a Comment