Shahid Kaleem
main intiha-e-yas men tanha khaḌa raha
saaya mira sharik-e-safar DhunDhta raha
phaili thi charon samt siyahi ajiib si
main haath men charagh liye ghumta raha
yaad us ki duur mujh ko sar-e-sham le ga.i
main saari raat apne liye jagta raha
ḳhud ko sameT lene ka anjam ye hua
main raste pe sang ki surat paḌa raha
kaghaz ki naav gahre samundar men chhoḌ kar
main us ke Dubne ka saman dekhta raha
ThanDi hava ke lams ka ehsas tha ajiib
main der tak shajar ki tarah jhumta raha
Leave a Reply