Haidar Ali Aatish
raftagan ka bhi ḳhayal ai ahl-e-alam kijiye
alam-e-arvah se sohbat koi dam kijiye
halat-e-gham ko na bhula chahiye shadi men bhi
ḳhanda-e-gul dekh kar yaad ashk-e-shabnam kijiye
aib-e-ulfat roz-e-avval se miri tinat men hai
dagh-e-lala ke liye kya fikr-e-marham kijiye
apni rahat ke liye kis ko gavara hai ye ranj
ghar bana kar gardan-e-mehrab ko ḳham kijiye
ishq kahta hai mujhe raam us but-e-vahshi ko kar
husn ki ghairat use samjhati hai ram kijiye
raat sohbat gul se din ko ham-baghal ḳhurshid se
rashk agar kiije to rashk-e-baḳht-e-shabnam kijiye
dida-o-dil ko dikhaya chahiye didar-e-yar
husn ke aalam se a.inon ko mahram kijiye
shakl-e-gul hans hans ke roz-e-vasl kaaTe hain bahut
hijr ki shab sub.h ro kar misl-e-shabnam kijiye
thi saza apni jo shadi-marg qismat ne kiya
hijr men kis ne kaha tha vasl ka gham kijiye
aap ki nazuk kamar par bojh paḌta hai bahut
baḌh chale hain had se gesu kuchh inhen kam kijiye
uTh ga.i hain samne se kaisi kaisi suraten
roiye kis ke liye kis kis ka matam kijiye
roz mardum shab kiye deta hai surma pochhiye
ḳhuun hote hain bahut shauq-e-hina kam kijiye
a.ine ko ru-ba-ru aane na diije yaar ke
shana se ‘atish’ mizaj-e-zulf barham kijiye
Leave a Reply