udhḌe hue malbus ka parcham sa gaya hai
bazar se phir aaj koi ham sa gaya hai
jhonka tha magar chheḌ ke guzra hai kuchh aise
jaise tire paikar ka koi ḳham sa gaya hai
chhoḌun ki miTa Dalun isi soch men gum huun
a.ine pe ik qatra-e-ḳhun jam sa gaya hai
galon pe shafaq phulti dekhi nahin kab se
lagta hai ki jismon men lahu tham sa gaya hai
ankhon ki tarah dil bhi barabar rahe kaḌve
in tang makanon men dhuan jam sa gaya hai
‘sajjad’ vahi aaj ka sha.ir hai jo pal men
bijli ki tarah kaund ke shabnam sa gaya hai
Leave a Reply