Haseebul Hasan
chhoḌ jaane ki vo jur.at bhi nahin kar sakta
buḌhi rasmon se baghavat bhi nahin kar sakta
tu miri jaan hai magar hai to tava.if hi naan
main tiri khul ke himayat bhi nahin kar sakta
vo jise pujte ik umr guzari ham ne
kya vo ik baar inayat bhi nahin kar sakta
dil jo bachcha tha bahut shoḳh tire jaane par
aise sahma hai shararat bhi nahin kar sakta
ishq karne ka mujhe kahti hai samjhao use
mujh sa mazdur mohabbat bhi nahin kar sakta
meri mayyat pe kahan vaqt se vo pahunchega
jo ki bar-vaqt ayadat bhi nahin kar sakta
aḳhiri umr men mafluj hua baap huun main
apne bachchon ko nasihat bhi nahin kar sakta
Leave a Reply