phuul se ma.asum bachchon ki zaban ho ja.enge
miT bhi ja.enge to ham ik dastan ho ja.enge
main ne tere saath jo lamhe guzare the kabhi
aane vaale mausamon men titliyan ho ja.enge
kya ḳhabar kis samt men pagal hava le ja.egi
jab purane kashtiyon ke badban ho ja.enge
tujh ko shohrat ki talab uncha uḌa le ja.egi
duur tujh se ye zamin-o-asman ho ja.enge
yaad aa.egi unhen kya kya hamari be-hisi
jab hamare ahd ke bachche javan ho ja.enge
mere naghme meri ḳhatir kuchh bhi hon ‘vali’ magar
aag barsati ruton men badliyan ho ja.enge
Leave a Reply