Poet
faza men rang se bikhre hain chandni hui hai
kisi sitare ki titli se dosti hui hai
miri tamam riyazat ka ek hasil hai
vahi dua jo tere naam se judi hui hai
main hadse se nikal aai huun magar dekho
zamin ab bhi mire jism par padi hui hai
abhi to tu ne mira haath bhi nahin thama
ye kis khabar se zamane men sansani hui hai
udasi jonk hai ye khuun chuus leti hai
ye baat main ne kahin aur bhi suni hui hai
main tere lams ke jaadu se khuub vaqif huun
vo shakh huun jo tire haath par hari hui hai
jo ankhen senk rahe hain unhen khabar hi nahin
yahan pe khvab jale hain to raushni hui hai
main laal rang lagati thi niile khvabon ko
isi liye to ye taabir kasni hui hai
vo mere baare men kya sochta hai kya maalum
khuda se meri mulaqat sarsari hui hai
main pichhle saal ki tasvir bhej deti tujhe
magar ye ek taraf se zara jali hui hai
maza to jab hai ki ‘injil’ hi lage sab ko
nuzul-e-ishq pe jitni bhi shairi hui hai
Leave a Reply