shikva karte hain zaban se na gila karte hain
tum salamat raho ham to ye dua karte hain
phir mire dil ke phansane ki hui hai tadbir
phir na.e sar se vo paiman-e-vafa karte hain
tum mujhe haath uTha kar is ada se koso
dekhne vaale ye samjhen ki dua karte hain
in hasinon ka hai duniya se nirala andaz
shoḳhiyan bazm men ḳhalvat men haya karte hain
hashr ka zikr na kar us ki gali men vaa.iz
aise hangame yahan roz hua karte hain
laag hai ham se adu ko to adu se hamen rashk
ek hi aag men ham donon jala karte hain
un ka shikva na raqibon ki shikayat hai ‘hafiz’
sirf ham apne muqaddar ka gila karte hain
Leave a Reply