khul ga.iin ankhen ki jab duniya ka sach ham par khula
apne andar sab khule hain kaun hai bahar khula
qatl se pahle zara chiḳhon pe ik maqtul ki
kuchh dariche to khule lekin na koi dar khula
tang ho jaa.e zamin bhi ab to koi gham nahin
ham faqiron ke liye hai asman sar par khula
aadmi ke zahir-o-batin men kitna farq hai
aaj dauran-e-masafat ham pe ye manzar khula
do dua.en shaah ko jin ke zamane men ‘zafar’
vo pazira.i hui ‘ghalib’ ka har jauhar khula
Leave a Reply