Khul Gain Aankhen Ki Jab Duniya Ka Sach Hum Par Khula

khul ga.iiñ āñkheñ ki jab duniyā kā sach ham par khulā

apne andar sab khule haiñ kaun hai bāhar khulā

qatl se pahle zarā chīḳhoñ pe ik maqtūl kī

kuchh darīche to khule lekin na koī dar khulā

tañg ho jaa.e zamīñ bhī ab to koī ġham nahīñ

ham faqīroñ ke liye hai āsmāñ sar par khulā

aadmī ke zāhir-o-bātin meñ kitnā farq hai

aaj daurān-e-masāfat ham pe ye manzar khulā

do duā.eñ shaah ko jin ke zamāne meñ ‘zafar’

vo pazīrā.ī huī ‘ġhālib’ kā har jauhar khulā

Leave a Comment